O festival +QJazz reunirá en xullo na Coruña ao mellor do jazz, blues, son cubano e música brasileira

O concelleiro de Cultura e Turismo, Gonzalo Castro, presentou unha nova edición do festival internacional +QJazz, que reunirá a numerosos artistas do 1 ao 8 de xullo en diferentes espazos da cidade. O edil estivo acompañado por Pepe Doré, director de +QJazz. O acto de presentación tivo lugar no Teatro Colón, un dos escenarios do certame.

\”Desde o Goberno de Inés Rey levamos anos apoiando esta iniciativa porque nela conflúen os nosos espazos singulares ao aire libre, o emblemático Teatro Colón e as salas de concertos, piar fundamental da cultura na cidade\”, sinalou Gonzalo Castro durante a presentación. O festival +QJazz reafirma a súa identidade cunha programación exquisita e ecléctica, que inclúe figuras consagradas do jazz, lendas do son cubano, mestres do flamenco-jazz e propostas cheas de frescura como o blues europeo ou a música popular brasileira.

Ao longo dunha semana, diferentes espazos emblemáticos da cidade como o Teatro Colón, o Jazz Filloa, o Garufa Club ou a Sala Mardi Gras converteranse en escenarios para unha experiencia musical única. As entradas para todos os eventos, agás

O martes 1 de xullo, no Teatro Colón, actuará Champian Fulton Quartet. Pianista e vocalista estadounidense recoñecida pola crítica internacional, Champian Fulton é unha das figuras máis destacadas do jazz vocal actual. Influenciada por grandes como Sarah Vaughan, Bud Powell ou Count Basie, a súa interpretación combina virtuosismo ao piano cunha voz elegante e expresiva. Cunha ampla discografía e experiencia docente, traerá a Galicia un jazz clásico e sofisticado, abrindo o festival nun escenario ao aire libre con encanto histórico.

O mércores 2 de xullo, no Jazz Filloa, será a quenda de Marcel Pascual Quinteto. Desde Barcelona, o vibracionista Marcel Pascual chega coa súa proposta de jazz contemporáneo, onde conflúen a exploración sonora, a improvisación e a delicadeza melódica. O seu último traballo, Fluctuaciones, é unha mostra do seu talento como compositor e intérprete. A súa actuación no Filloa será unha oportunidade única para gozar dunha formación de gran calidade técnica e sensibilidade artística.

O xoves 3 de xullo, no Garufa Club, actuará Carles Benavent Trío. Auténtica lenda do jazz flamenco, Carles Benavent revolucionou o papel do baixo eléctrico en España. Coñecido pola súa colaboración con Paco de Lucía, Miles Davis ou Chick Corea, a súa traxectoria é sinónimo de innovación e virtuosismo. O seu trío promete unha noite chea de matices e liberdade creativa, nun espazo íntimo que potenciará a conexión co público.

Eliades Ochoa estará o venres 4 de xullo no Teatro Colón. Un dos grandes embaixadores da música cubana, foi membro fundador do mítico Buena Vista Social Club. A súa voz e guitarra deron vida a cancións icónicas como Chan Chan, converténdose nun símbolo da identidade sonora de Cuba. Con décadas de carreira, múltiples Grammys Latinos e unha discografía exemplar, a súa presenza no festival é un dos pratos fortes desta edición.

Por outra banda, Turma Caipira estará o sábado 5 de xullo no Garufa Club. Formada na Coruña en 2009, esta é unha banda especializada na música popular brasileira (MPB), cun repertorio que percorre samba, bossa nova, baião e outras expresións sonoras do Brasil. Cunha proposta íntima e elegante, a voz de Marga Ramos acompáñase de músicos versátiles como Samuel Pérez, Quique Alvarado e Fran Castro, todos con ampla traxectoria en diversos estilos.

O domingo 6 de xullo será a quenda de Quique Gómez & His Vipers na Sala Mardi Gras. Son considerados unha das mellores bandas de blues e rhythm & blues de Europa e destacan pola súa forza escénica e a autenticidade do seu son. Gómez, cantante e virtuoso da harmónica, ten colaborado con grandes lendas do blues americano e conta cunha sólida carreira internacional.

Pechará o ciclo Rick Estrin & The Nightcats o martes 8 de xullo na praza de Azcárraga, con entrada de balde. Trátase dunha banda estadounidense galardoada en múltiples ocasións nos Blues Music Awards. O seu estilo mestura blues tradicional con swing, jump blues e rockabilly, cun directo explosivo e cheo de carisma. Rick Estrin, coñecido polas súas letras irónicas e interpretación teatral, estará acompañado pola guitarra de Chris \”Kid\” Andersen e unha potente sección rítmica que deixará unha pegada inesquecible no público galego.