Rodolfus, comendo Galicia: “Percorremos toda a nosa terra a través da copa”

Por Patricia Dopazo de Gente que cuenta

Que é a vida? A gran pregunta… Quizais… Secuencia de ciclos… Cada momento nela ofrécenos algo. Aceptar que a vida é cambio faise esencial para gozala e vivila. Todo nela ten un principio e un final, o que é hoxe quizais non sexa mañá. Pechar etapas, capítulos ou historias é algo cotiá que todos vivimos. Cambio, evolución, crecemento, aprendizaxe.

E agora, neste novo ciclo da miña vida, vou da man de Rodolfus. Non podería atopar mellor compañía. Nunca me sentín tan motivada, implicada e valorada.  Ábrese unha porta moi bonita porque dentro hai xente máis bonita aínda. A vitalidade de Leo, a súa positividade e o amor pola súa familia. A profesionalidade, o entusiasmo, o sentimento e o amor polo viño de Vanessa. Vela na sala é marabilloso, como explica os proxectos con ese brillo que nace da paixón polo que fai. A paz que dá María. A súa harmonía, equilibrio, positividade e boa enerxía que enche a Rodolfus dunha vibra máxica. Rodolfus somos nós para vós. Un concepto innovador cheo de entusiasmo, corazón e ganas. Podedes atoparnos na rúa Damas 2, da cidade vella da Coruña, e nas redes sociais como @rodolfus.gal

A súa mensaxe… Galicia enteira, co seu potencial e riqueza, promocionándoa para que non quede na sombra e sexa recoñecida. Sentados nunha cadeira feita con material mariño reciclado podemos viaxar a calquera lugar de Galicia cun bocado ou cun grolo. Benvidos a Rodolfus!

Cal é a historia de Rodolfus?
María: Somos unha parella de galegos retornados que durante os nosos anos vivindo no estranxeiro botamos moito de menos a comida  de aquí: o pan, a empanada, os queixos, os chourizos, as verduras galegas…

Leo sempre traballou na xestión de equipos, pero unha das primeiras cousas das que falamos cando nos coñecemos foi o viño e que lle gustaría ter unha viña de maior. Entón comezou a pensar na idea de construír unha adega. É moi emprendedor e sempre ten o cerebro traballando.

Eu son fotógrafa gastronómica e nos meus primeiros anos como freelance, cando buscaba  clientes no mundo da alimentación, sorprendeume a cantidade de produtos artesáns que se elaboran en Galicia e polo pouco que se coñecen.

Durante a pandemia recuperamos a idea da adega e fusionámola cunha tenda de ultramarinos… e así naceu Rodolfus.

E por que se chama Rodolfus? Cando estabamos esperando o noso primeiro bebé, Leo chamoulle en broma «Rodolfito». Ao final, tivemos tres nenas… así que por dereito había que chamarlle así a este cuarto fillo.

Palabra ou frase que define a Rodolfus.
María: Comendo Galicia, o slogan perfecto inventado pola nosa filla de 11 anos.

Leo: Equipo, confiando nos teus compañeiros e sabendo que están aí cando o necesitas.

Patri: Non poderás nadar a novos horizontes senón tes o valor de perder de vista a costa. (William Faulkner ).

Vanessa: Equipo, unión.

Que representa o viño para cada un e un momento especial arredor do viño.
María: Para min representa o encontro, compartir, charlar, proximidade… non en todos os momentos especiais hai viño, pero cando hai viño para min é sinal de que o momento é especial.

Leo: Momentos coa familia e os amigos. Encontros incribles como o da Fonte de A Saúde con todo o equipo! Un día marabilloso e inesquecible.

Patri: Futuro, motivación e ilusión. O viño deume luz nun momento no que todo era escuro, a súa aprendizaxe encheume de forza e inquietude. Abrir unha botella de viño e compartila, só ou con outras persoas, é un momento especial. Fainos viaxar, descubrir, sentir…

Vanessa: Para min o viño é, ademais da miña paixón, unha ferramenta cultural con gran poder socializador. Abriume as portas a un mundo novo cheo de coñecemento, grazas a el atopei persoas marabillosas que son unha parte importante da miña vida. Vivín moitos bos momentos arredor do viño: reunións familiares, con amigos… pero se teño que escoller unha, escollería as dúas vendimas con Saleta e Jorge de Adega Saíñas. Uns días moi especiais nos que tiven a oportunidade de mergullarme no duro traballo que hai detrás dunha botella e gozar da xenerosidade e cariño desta familia que me abriu as portas da súa casa e da súa adega.

Que fai un bo viño?
María: Dáche boas sensacións cando o tomas e non che dá malos cando o dixeres. E se hai xente fermosa detrás que pon paixón en facelo, nótase moito.

Leo: Do traballo e o amor que se pon en algo ben feito.

Patri: Dende a viña ata o momento de bebelo hai un proceso cheo de traballo, dedicación e, sobre todo, corazón. O bo viño faise co amor e o cariño.

Vanessa: Para min, un bo viño nace do amor pola terra, da sensibilidade, do coñecemento e da experiencia de quen o elabora porque está directamente ligado ao terreo, á zona e á calidade das uvas. Dende o meu punto de vista, se estes factores conflúen, o viño acadará personalidade, expresividade e estilo. Un bo viño emociona e crea memoria.

Vanessa, fálame da adega: que a caracteriza? Por que o viño galego?
Vanessa: Gústame definir a adega como un mapa líquido de Galicia, queremos percorrelo a través da copa, dando protagonismo á orixe, poñendo o foco nos concellos, vilas e viñedos, falar dunha Galicia vitivinícola máis concreta. Cada un dos proxectos elixidos para a adega inicial ten unha representación que chamamos “piramidal”. Son proxectos tremendamente vinculados á súa zona, que coñecen o seu terreo, a súa historia, as súas tradicións.

É unha adega incipiente que aínda non ten o peso das anadas, pero si que ten un percorrido pola zonificación que os diferentes produtores elixidos realizan a través dos seus viños. A diversidade de climas, solos e o gran abanico de varietal que temos permitiunos “zonificar” a nosa adega en tres grandes grupos: Atlántico, Interior e Oriental. É un recuncho especial para nós cheo de diversidade onde conviven proxectos xa consolidados que situaron a Galicia no mapa do viño internacional con proxectos emerxentes que o están a facer moi ben e teñen moito que dicir.

Como é o servizo do viño en Rodolfus e que se quere transmitir?
Vanessa: O primeiro que queremos é que o cliente goce, que se divirta, que non teña limitacións nin tecnicismos, este é un proxecto familiar, coa sinxeleza da naturalidade… Deste xeito, convidámolos a coñecer a historia da zona que están a visitar a través do cristal, o factor humano que a conforma.